Државната комисија за спречување на корупцијата (ДКСК) побара Јавното обвинителство да преземе истражни дејствија околу начинот на кој е донесен деталниот урбанистички план „Голем ринг - јужен дел исток“ во Општина Центар. Станува збор за ДУП со кој е предвидена изградба на висококатници спроти „Холидеј Ин“.
Иницијативата од ДКСК се однесува на градоначалникот на Општина Центар во периодот 2009-2013 година, Владимир Тодоровиќ, на градоначалникот на Општина Центар во периодот 2013-2017 година, Андреј Жерновски, раководителот на Секторот за урбанизам во општина Центар од 2012 година, раководителот на Секторот за уредување на просторот во Министерството за транспорт и врски во истиот период, помошникот раководител на Секторот за планирање и уредување на просторот на Град Скопје во истиот период, како и на двајцата планери и овластеното правно лице „Билд“ ДОЕЛ Скопје, фирмата што го изработувала планот.
„Иницијативата е затоа што во постапката за изменување и дополнување на ДУП „Голем ринг“ за Општина Центар за 2012 – 2017 година тие ја злоупотребиле својата службена положба и ги пречекориле границите на службеното овластување, постапувајќи спротивно на членови од Законот за просторно и урбанистичко планирање и со тоа прибавиле значителна имотна корист за сопствениците на градежната парцела 1.1. од ДУП во делот „Голем ринг““, рече претседателката на ДКСК Билјана Ивановска.
Овој ДУП е донесен 21 декември 2012 година, а ДКСК смета дека со неговото носење сторени се повреди како од страна на планерите, кои како професоналци од областа се обврзани да постапуваат според правилата од струката и законските прописи, но и од страна на вработените во општината и во Градот Скопје и во Министерството за транспорт и врски, кои ги занемариле ваквите пропусти и со тоа овозможиле донесување на ДУП спротивен на законските прописи.
Деталниот урбанистички план „Голем ринг – јужен дел исток“ (Ц08) сè уште е на сила иако не е усогласен со Генералниот урбанистички план
Основата за оваа иницијатива за кривично гонење е битката кои дел од граѓаните ја водат со локалните и државните моќници години наназад, истакна Билјана Ивановска, претседателка на ДКСК и додаде дека на истиот начин се донесени и други планови во Општина Центар. Таа најави дека ДКСК понатаму ќе истражува и за останатите планови кои на многу сличен начин биле донесени во тој период односно не биле усогласени со Генералниот план од 2002 година, ниту со тој од 2012 година. Ивановска изрази надеж дека ќе произлезе некаков епилог по оваа иницијатива од страна на ДКСК.
Таа информира дека на средба со актуелниот градоначалник на Општина Центар им било кажано дека на почетокот на неговиот мандат до ЈО поднеле информации кои се однесуваат на законско пречекорување на ДУП-овите.
„Заклучно досега од Јавното обвинителство досега не сме виделе некоја поголем активност и се надеваме дека вака разработена нашата иницијатива, ќе им помогне побрзо да дејствуваат“, рече Ивановска.
Таа информира дека во функција на решавање на проблемите од урбанизмот и градежништвото, ДКСК имале состаноци со министерот за транспорт и врски и со директорката на Агенцијата за планирање на просторот, како и со сите градоначалници од оваа областа, по што било заклучено дека причините за ова состојба треба да се бараат многу наназад во годините.
Нури Бајрами, член на ДКСК ги повика сите институции и вработените во јавниот сектор да укажуваат на вакви случаи и да станат заштитници за животната средина.
МИА
